ضيف في الأدبي (18) ... مي هديب

[ام يحيى]

وأهلين فيكي عزيزتي

أما شو دارسة ههههههههههههههههههههههه فعدي يختي

دبلوم information technology مفصولة من التخصص قبل التخرج بعشرين يوم

دبلوم تصميم داخلي ... حردت بعد تلات فصول وبطلت .

حالياً مسجلة أدب إنجليزي

حظي من الدراسة قليل للأسف وبتمنى إني أقدر أتجاوز العقبة هاي في حياتي

غريب
ما شاء الله عليكي
عندك معرفة وثقافة عاليتين
استمري رح تتخطي هل عقبة
لانه عند هل مقدرة
موفقة يا رب ~

[صمت البشر]

...لي عودة يا مي ...أخالفك في :
الحرية ليست مطلقة بالمفهوم العام ...فحر أنا بدي أعدل على موضوعك أيما شئت فهل هذاه حرية خاصة أني أملك خاصية التعديل ..مثلاً...
الدين لا يقيد الحرية ..بل هو الرافد الاساسي .."فهل استعبدتم الناس و قد ولدتهم أمهاتهم أحرارا"...
سرقة الجحوش هي اشاعة على شخص واحد و أخذت التعميم ..و الرد يكون بـ "دير بالك على حالك"

الدين دين يسر ان احترمناه وعملنا بمبادئه و قواعده ..و الدين ان خالفناه ولم نلتزم بعقائده و قواعده أصبح عسراً علينا ...

شيء آخر ..ياريت تقتبسي المشاركة يا مي ويكون الرد تحت السؤال مباشرة ...واتذكري اني قلت يا ريت بلاش تقولي ديكتاتوري هههه

[Majed Fares]

تحياتي للاخت مي
شو مساحة الرياضة بحياتك...
مين غسان كنفاني.... بالنسبة لمي؟
رأيك في الإنقسام الفلسطيني في الاعوام السابقة ما بين حماس و فتح؟
ورأيك في العودة لطاولة الحوار من جديد؟
بعد ياسر عرفات و احمد ياسين.... من هو القائد الحقيقي القادر على قيادة شعب ثائر بطبعه؟

من IT الى تصميم داخلي الى الادب الانجليزي....
شو علاقة الثلاثة تخصصات مع بعض؟
وهل هذا جزء من شخصية مي "المعجوكة" إن صح التعبير؟
هل تعتبر مي نفسها ذات:
One dimention
ام
Three dimention

رأيك بكل صراحة في الوحدات نت كموقع رياضي؟

سؤال أخير:
ماذا تريد مي من هذه الحياة وما هو حلم مي؟

تحياتي و تقديري

شكراً لذياب على هذه الاستضافة

[لحن الجراح]

بداية اشكر المشرف الفاضل على هذه الاستضافة الطيبة للمبدعة مي
كما ارحب بك اجمل ترحيب يليق بك مي

لدي الآن سؤال واحد : هل تسكنين الادب ام هو يسكنك ؟
ولي عودة

[رمزي الياموني]

اهلآ وسهلآ اختي مي هديب
للامانة اعتبرها استضافة من نوع خاص وساحاول ان اشرح جملة نوع خاص من خلال بعض الاسئلة التي سأطرحها هنا واتمنى ان اجد اجابة عليها

[رمزي الياموني]

* الاخت مي هديب تمتلك من الفكر الكثير وعلى استعداد ان تناقش اديان وتراث وعلم قديم وحتى ما انتبهت له انكي تمتلكين القدرة على نقاش حضارات قديمة والدخول في تحاليل قد يكون الكثير لم يسمع حتى عنها
كيف وصلتي الى ذلك
ما هو من خلال رؤيتك الفارق بين الفكر الحالي من اجيال والفكر القديم من خلال العلم ومن خلال الحياة العامية ؟؟؟؟؟؟؟؟؟

* اين مي هديب من التعامل مع الحياة بتاريخها السابق ومع الحاضر وتقلبات المرأة الشرقية والى اي طرف تميلين ؟؟؟؟؟؟

ما اجمل كتاب قرائتيه وما هي الكتب التي تثير اهتمامك وماذا اخذت منها لنفسك ؟؟؟؟؟

بالطبع ان سمحتي لي سأعود لأدرج بعض الاسئلة الاخرى
تحياتي واحترامي

[ابواياد الكرمي]

تحياتي للكاتبه والاديبه مي هديب .. انت تملكين قلما يندر وجوده بين الشباب وانت تملكين حسا ثوريا وقياديا عاليا فمن اجابتك يتضح للعيان بانك متمرده وذات شخصيه قويه لا تحب المجامله ... فدمت ودام قلمك وارجو ان لا تحرميني من نزف ابداعاتك
بالنسبه للسؤال فهو سؤال قد يكون معقدا بعض الشيئ وانت تملكين حق عدم الاجابه ان رايتي في ذلك مصلحه ..
ما رأيك في الداخل الفلسطيني وكيف تنظرين الى الوضع الحالي ؟
ما هي نظرتك للاحزاب الفلسطينيه
فتح -حماس - الجبهه الشعبيه ؟؟ وايهم يمثل اغلبية الشارع الفلسطيني وهل يوجد صف لم يدخل السجال الحزبي بعد يستحق التواجد على الساحه (بالاحرى هل تؤيدين الحراك الشبابي غير المنطلق والتابع لاجندة حزب معين ) ؟
الا ترين ان تقسيم الشعب الفلسطيني الى انتماءات متعدده تضر بالقضية الفلسطينيه ام انها ضريبة التعدديه ؟؟
ودمت بخير...

[ضيف]

الأخ ماجد فراس مسا الخير وجمعة كريمة علينا وعليك

إجابة على أسئلتك :

شو مساحة الرياضة بحياتك...

يعني صحيح إني بعيدة عنها هلئ لكن هي مش مساحة بقدر ما هي علاقة لاعبة كرة سلة لغاية سنة تانية كلية ولاعبة تنس طاولة " بنغ بونغ " لغاية قبل سبع سنين ... وبتعرف بحكم الوكالة لازم نكون تدربنا على كل من الريشة والطائرة واليد... وأكتر شي بدعت فيهم البنغ بونغ والسلة... علماً إني بعشق اليد أكتر منهم التنتين لكن اليد فعلياً أصعب بكتير منهم التنتين بحكم إني لعبت في مدارس الوكالة بمركز صانع ألعاب في اللعبة هاي هههههه لأني قصيرة ما تبقى من الرياضة في حياتي اهتمامي وحبي لكرة القدم كمشاهدة والمشي لمسافات طويلة بشكل دائم ...


مين غسان كنفاني.... بالنسبة لمي؟

معلمي .... قائدي .... ملهمي .... مثالي الأعلى ... ورمز فكري يدفعني دائماً لإشغال مساحات دائمة في التفكير بأصغر الأشياء وأعظمها وإعطاء أهمية لكل تفصيلة مهما كانت وأيما كانت... وماشية على جملته الشهيرة " كل الحقيقة للجماهير "

رأيك في الإنقسام الفلسطيني في الاعوام السابقة ما بين حماس و فتح؟

راح يزعل مني كتاااااااااااار لو حكيت رأيي الصريح ولكن بقتبس مثل مباشر وقاسي " وافق شن طبق " ومصالح تضاربت واللي دفع الثمن إنجاز الشعب الفلسطيني أي تقدم في اتجاه مصالحه لصالح متصارعين ذاتيين .


ورأيك في العودة لطاولة الحوار من جديد؟

لعبة السياسة ... هيك حكمها ... أو زي ما حكاها عبد الله حداد تكتيك !!! وأول ما يصير أي تضارب راح يرجعوا يرفعو سلاح ع بعضهم لأنه الطرفين ما عندهم اشي مقدس سوى قديش الهن سيطرة وبسط نفوذ وقوة للأسف وبحكي عن سياسة عامة وقيادات سياسية للطرفين.

بعد ياسر عرفات و احمد ياسين.... من هو القائد الحقيقي القادر على قيادة شعب ثائر بطبعه؟

أول اشي ما في اشي اسمه القائد الأوحد والمطلق وهتلر زمانه ولا نابليون زمانه قادر على قيادة شعب ولأجل ذلك تباعاً بتجد بفقدان القائد بفقد الشعب بوصلته... الشعب محتاج تنظيم على مستوى طموح هالشعب مؤسسة فعلية تنهض فيهم وتمثل طموحاتهم وآرائهم وحقيقتهم مش قائد أوحد فالأمل في إيجاد فكر ناضج يقود هاي الجماهير زي ما كان بداياته في العشرينيات واللي أنا بعتبر تحولها للقائد الواحد كان أحد أشكال اغتيال نضال الشعب الفلسطيني على يد البرجوازية الفلسطيني من أمثال أمين الحسيني وخلافه ...


من IT الى تصميم داخلي الى الادب الانجليزي....
شو علاقة الثلاثة تخصصات مع بعض؟
وهل هذا جزء من شخصية مي "المعجوكة" إن صح التعبير؟

أول اشي في قصة لازم تعرفوها عني ... أنا أول سنة توجيهي كنت حالفة يمين ما أنجح لأجل الجكر هيك لأجل أبوي يفرض علي إني أروح علمي وأنا حلم حياتي إني أدرس إما فنون جميلة لبراعتي في الرسم بشكل عام أو أدب إنجليزي لطموحي في البناء المعرفي في عالم الأدب وتطور نظرياته النقدية فرسبت يا سيدي العزيز ... فكانت العقبة التانية وهي إنه والدي وعدني إن نجحت التانية في التوجيهي بمعدل فوق الخمسة وسبعين فراح يخليني أدرس وين ما بدي وبأي بلد بدي اياها ... فكان حلمي إني أدرس ببغداد وفعلا نجحت وجبت تمنية وسبعين تاني سنة فكان هو عند وعده وجهز وراقي ونقبلت في جامعة بغداد لكن؛ وللأسف وازا إنت من جيالي بتعرف وإنه كان وقتها توصل أخبار للأردن إنه في قصف أمريكي بوصل شارع فلسطين في بغداد حيث كان المفروض إني أسكن هناك فإمي حلفت مية يمين معظمات ما بروح ع بغداد يا بنقلع ع سورية يا الجزائر يا بلغاريا وأنا حلمي بغداد فكان العناد من طرفين طلعنا بالآخر إنه فشي أسافر بالتالي استسلمت لرغبة أبوي مرة تانية ودرست الآي تي هيك لله والوطن وعلمي فيها زي علم ستي في الصيني رسمياً

أما التصميم الداخلي فلما قررت أدرس تصميم داخلي بعد فصلي من الكلية أول مرة وانتهاء فترة حرماني فكان لحبي وشغفي بالفنون ... لكن اكتشفت إنه أبدا أبداً عمره الفنون التطبيقية ما بتقربني من رغبتي الخاصة باتقان أي نوع من الفن وبصراحة هههههههههههه مدرسة المادة كانت تكره الكبار لأنه احنا أكبر منها وهي أزغر منا فطرقت الباب بوجهها وشوية مشاكل رافقت الحدث خلتني أنهي دراسة التصميم الداخلي العظيم واللي بقرب لكل اشي الا للفن.

أما الأدب الإنجليزي فهو قرار طفولة قديم وحلم ما انتهى ولأجل ذلك في أول فرصة قدرت أرجع أبدا فيه رجعتله مباشرة

إنه جزء من شخصيتي المعجوقة ؟؟؟ ما بعرف يمكن !!! ويمكن أنا تراتيب حياتي فيها أحداث كتيرة سمحت ولا زالت بتسمح لإيجاد عجقات أكتر وأكتر.


هل تعتبر مي نفسها ذات:
One dimention
ام
Three dimention

لا هاي ولا هاي لأني وصلت للبعد الخامس بصراحة ههههههههههههه وهون بصير أقلك دخل العجقة بالأبعاد دخل كبير بمزج كتير أشياء ما بين الأدب والفن والسياسة والممارسة الاجتماعية والنشاط العام والاهتمام بالرياضة والسرحااااااااااان والتدقيق بشغلات أكتر بكتير مما إني أقدر حتى أعبر عنها.


رأيك بكل صراحة في الوحدات نت كموقع رياضي؟

كموقع رياضي فهو موقع متقدم وبصراحة بلاقي فيه أرشيف شغلات كتيرة مهمة لما بدي أرجع لأعمل إحياء لزاكرتي بخصوص أشياء بعينها... وبصراحة بحضر شغلات كتيرة منه لجلساتنا العائلية بما إنه احنا مخولين في الشغلة هاي وقعدتنا مع خوالي وهم موسوعات متنقلة بما يختص في الوحدات فما بحب أكون على جهالة بحضرتهم... بس بناحية أخرى يا وحدات نت لا تنسوا شو يعني نادي الوحدات صحيح إنه فريق كرة القدم جزء لكنه مش كل في تاريخ في تفاصيل جميل لو كانت ضمن الوحدات نت.


ماذا تريد مي من هذه الحياة وما هو حلم مي؟

بدي أعيش بسلام فقط لا غير .... حلمي وهي عدة أحلام وذكرت واحد منها للأخت حنان لكن من ضمن أحلامي إنه أبطل أصادف بشر ياكلو معي ومن ورا ضهري يطلعوني اشي لا يزكر بالأساس فقط لأني اجتماعياً بختلف معهم. ومش زنبي إني نولدت في بيئة قوامها الاجتماعي مش تقليدي لكن زنبهم هن إنهم مش قادرين يقبلو غيرهن حتى ربنا بكررها قال " أيحب أحدكم أن يأكل لحم أخيه ميتا " ... صدق الله العظيم.

[ضيف]

* الاخت مي هديب تمتلك من الفكر الكثير وعلى استعداد ان تناقش اديان وتراث وعلم قديم وحتى ما انتبهت له انكي تمتلكين القدرة على نقاش حضارات قديمة والدخول في تحاليل قد يكون الكثير لم يسمع حتى عنها
كيف وصلتي الى ذلك
ما هو من خلال رؤيتك الفارق بين الفكر الحالي من اجيال والفكر القديم من خلال العلم ومن خلال الحياة العامية ؟؟؟؟؟؟؟؟؟

بداية لازم أحكي إنه أنا عشت في منطقة تزخر بالإرث الأسطوري بما يختص باليهود وهي منطقة جنوب السعودية نقلتي من هديك المنطقة وطريقة المعيشة فيها إلى الأردن شكلت عندي حالة سؤال كبير بتبعه عدة أسئلة أبداً ما كنت أقتنع فيها لما تنحكى قدامي كمسلمات... يمكن منهاج التاريخ في جيلي كان زاخر جداً ومدرسة التاريخ واعتراضها على المكتوب في المنهاج وحثها إلنا للبحث وقراءة أبحاث وشرح مصطلحات عميقة في التاريخ كمتخصصة في التاريخ دفعني أكتر لأنه أتعمق في هاد العالم حالة السؤال والحث على البحث ركزت عندي الاهتمام بشكل خاص بتاريخ منطقة الهلال الخصيب اللي هي سورية الطبيعية والعراق... هاي المنطقة لفت انتباهي حجم المعركة عليها والصراع من وأنا عمري 15 سنة لما أبوي أهداني كتاب التوراة جاءت من الجزيرة العربية أما بلشت أقرأ فيه وبلشت أتعمق في الكتاب أول جملة خطرت ع بالي " يسعد ربك يا دكتور " والله إنه هاد الحكي اللي كنت بعتقد فيه بطفولني حسب البيئة الجغرافية والسكانية الموجودة كيف بالأردن صارت اشي تاني مش فاهمة؟

التناقض ما بين رواية الأقل تحضراً والأكثر تحضراً أثارت ألف سؤال في بالي الاشي اللي خلاني دائمة البحث عن كل ما يتعلق بالتاريخ بخصوص منطقة سورية الطبيعية فانتقلت بين كتير من المؤلفات والمناهج الفكرية والدراسية واللي عزز هاد الشي نشاطي مع لجنة شباب لأجل القدس التابعة لجمعية حماية بيت المقدس ما بين عمان والقدس وبرامجها... هلئ الحورات اللي بنخوضها والدراسات ولقاءاتنا مع باحثين كتير عززت من فهمي وإدراكي ومعرفتي وإطلاعي لأنها من خمس سنين شبه أسبوعية ربما هي مش منشورة لأسباب مادية بحتة، لكنها خرجت مجموعة رائعة من الشباب والصبايا قادرين تماماً على إكمال مشوار كتير من باحثينا الأفاضل واللي إلهن كل الفضل في إثارة أسئلتنا الجدلية حول التاريخ وفهمه ومنهم المرحوم كمال الصليبي والمرحوم جودت السعد والأستاذ الدكتور محمد الفرا الله يطول بعمره ويزيدنا من الاستفادة منه.

الجيل الحالي فاقد بوصلته للأسف... وهاد ما بعني إني بتهمه على فكرة أنا بعتبر حالي حالياً أنا وجيلي جيل قديم مش جديد لأنه احنا لحقنا انه النسوان تنزل تلقائياً على الشوارع في يوم غضب.. لحقنا لما يعلن الحداد وترفع الأعلام السوداء ولما ينحكى إضراب أخو أخته اللي يفتح باب محل ... تربينا على جو مشحون ومتوتر ومدرك وين رايح ووين جاي ... يعني كان النا هدف... الجيل الجديد للأسف فقد البوصلة اللي تخلي إله هدف حقيقي في الحياة وحتى نتاجه نتاج طفيف ما اله علاقة بالواقع وغير قادر على محاكاة هاد الواقع لدرجة إنه ممكن ينال من كل اللي قبله لمجرد إثبات انه الجيل اللي سبقه غلط ... يا عمي كل اللي قبلكو غلطو بس أبداً ما كانوا يستنو منكو التطقيع والتفاهة وانك عاااااااادي جدا تستخدم مقدساته متل فلسطين للاستهزاء منه وعااااااادي جدا تلاقي فيهم اللي يسب على فلسطين أو شهيد بس لأنه جاي ع باله يمزح !!!

[ضيف]

* اين مي هديب من التعامل مع الحياة بتاريخها السابق ومع الحاضر وتقلبات المرأة الشرقية والى اي طرف تميلين ؟؟؟؟؟؟

ازا أنا فهمت سؤالك فالمرأة العربية في السبعين حملت السلاح ... وخطفت طائرة ... وناضلت ... ولا زال الكثير منكم بستخدموهن كرمز للتفاخر ... المرأة في السبعين أنجزت وأعطت بدون حساب ... لكن المرأة اليوم صارت وهم إمرأة لأنه مظفر النواب لما حكا قصيدة البراءة فهو عبر بتمام التعبير عن المرأة العربية المطلوبة مرأة ما بتزعل من حبسة ابن الها... وبتزغرت لشهادة الواحد فيهم ... وبتوقف قدام كل الدنيا عشان ما يكون ابنها مش رجل وبنتها مش حرة

بس المرأة اليوم ما بعرف شو صار الها لا يا سيدي بعرف خطفت من دورها لتمارس دور هوس عيب بخاف عليك بحيث أنتجت جيل ماايع لا شكل له ولا لون ولا طعم ولا رائحة ... وبكل تأكيد بميل للمرأة العربية تاعت السبعينيات وأبداً ما بميل للمرأة تاعت اليوم لأنها مشوهة وشوهت كتار بسبب تشويهها بشغلات هي في الواقع مجرد شكليات للتراجع في دورها الحقيقي

[ضيف]

ما اجمل كتاب قرائتيه وما هي الكتب التي تثير اهتمامك وماذا اخذت منها لنفسك ؟؟؟؟؟

بالطبع ان سمحتي لي سأعود لأدرج بعض الاسئلة الاخرى
تحياتي واحترامي

بصدق ما في اشي اسمه أجمل كتاب قرأته ... لأنه كل كتاب بحد زاته جميل وبرفد الإنسان بمعرفة جديدة .. إنما في كتاب هو رواية لغسان كنفاني " ما تبقى لكم " الي علاقة خاصة جداً فيها وإلها مكانة خاصة جدا في قلبي .

كتب الدراسات الإسلامية والتاريخية والاقتصادية

كتب النقد الأدبي والأدب المقارن

كتب الأيديولوجيات والفكر السياسي

كتب الفلسفة بشكل عام وبشكل خاص الماركسية والشيوعية منها لأنها جدا بتنشط قدرتك على التحليل

المذكرات الشخصية للشخصيات السياسية سواء كانت اوتوغراف أو منقولة عنه

الروايات وخاصة الروسية واللاتينية والعربية أكتر من غيرها والدراسات الأدبية والشعر العربي والإنجليزي وخاصة الأمريكي منه


أما عن ما تركت في نفسي من أثر .... فهي وسعت أفاقي وخلتني قادرة على الكتابة وانشالله أصل لمرحلة إنجاز نوع خاص وبصمة خاصة في الكتابة بحيث ما أكون نسخة مكررة عن غيري ولو إني ما راح أقدر بطبيعة الحال إني ما أتأثر لأنه طبيعي أتأثر وبزات الوقت هاي الكتب خلتني قادرة على نقاش شغلات كتيرة وأنتبه لشغلات فعلياً هي أهم من القشور في مجالات متعددة بحيث إن كثر الكلام فيها ففي كل جملة فائدة

أما إزا في بالك أكتر بني آدم خلق فرق في حياتي فهم تنين " كارل ماركس " أعطاني كتير الإنسان هاد بقدرته اللانهائية على تشغيل العقل النقدي وعززه الراحل " إدوراد سعيد " اللي دربني على إني أقرأ أصعب النصوص والتنين فعلياً نصوص صعبة بتوسع الأفق والمدارك لصاحبها.

وطبعاً أهلاً وسهلاً فيك تسأل متى ما بدك وشو ما بدك

[ضيف]

تحياتي للكاتبه والاديبه مي هديب .. انت تملكين قلما يندر وجوده بين الشباب وانت تملكين حسا ثوريا وقياديا عاليا فمن اجابتك يتضح للعيان بانك متمرده وذات شخصيه قويه لا تحب المجامله ... فدمت ودام قلمك وارجو ان لا تحرميني من نزف ابداعاتك
بالنسبه للسؤال فهو سؤال قد يكون معقدا بعض الشيئ وانت تملكين حق عدم الاجابه ان رايتي في ذلك مصلحه ..
ما رأيك في الداخل الفلسطيني وكيف تنظرين الى الوضع الحالي ؟
ما هي نظرتك للاحزاب الفلسطينيه
فتح -حماس - الجبهه الشعبيه ؟؟ وايهم يمثل اغلبية الشارع الفلسطيني وهل يوجد صف لم يدخل السجال الحزبي بعد يستحق التواجد على الساحه (بالاحرى هل تؤيدين الحراك الشبابي غير المنطلق والتابع لاجندة حزب معين ) ؟
الا ترين ان تقسيم الشعب الفلسطيني الى انتماءات متعدده تضر بالقضية الفلسطينيه ام انها ضريبة التعدديه ؟؟
ودمت بخير...

الداخل الفلسطيني داخل مشوه بصراحة ... وهاي إجابة قد تستفز الكثيرين ... أما ليش فللاحتلال دور كبير في ذلك والاقطاع الزراعي شوه أكتر من الاحتلال في فترات كبيرة من تاريخ الشعب الفلسطيني ... ومن المؤسف إنه الداخل الفلسطيني يعتقد إنه هو صاحب ملكة تحرير فلسطين بتشوهاته الموجودة واللي هي أبداً مش طريق ولا راح تكون طريق .... وهاد الشي أبداً ما بعني إنهم مش مناضلين لكن السلوك العام الهن محزن للأسف لأنه الاحتلال قدر على خلق انفصال وترفع منهم تجاه الآخرين ..

شوف الحزبية أمر لا فكاك منه... أما أحزابنا الفلسطينية فلكل حزب فيهم وجهة نظر لكنهم يصنفوا لتلات أصناف

حزب السلطة : وما بقصد السلطة الوطنية بقصد الأحزاب الطامحة للسلطة بغض النظر عن شكلها وكيفيتها وشو متطلبها وهاي أحزاب راح يجي يوم وتكون مسبة في التاريخ وتحاكم بقسوة

حزب المنفعة: وهاي متل الطفيليات بتعتاش على سطوة أحزاب السلطة وهي بتروح وبتيجي حسب قربها أو بعدها ورضا وسخط أحزاب السلطة.

الأحزاب الثورية : وهي نواة لا زالت في أطر التشكل ، منها اللي اله تاريخ ممتد لكنه لا زال بخوض معارك فكرية بتعيق من حركته وبتم التآمر عليه سواء من أحزاب السلطة أو الاحتلال ... وبنتمنى الها الشفاء العاجل أو ناشئة حديثة وهي برضه بتخوض نفس معركة الأحزاب ذات الإرث وبنتمنى الها النمو الصحي وإنها تتجاوز العقبات الموجودة من أحزاب السلطة والاحتلال لأنه هاد النوع الأخير هو الي راح يقود الشعب الفلسطيني في الداخل لمكانه الصحيح.

فتح : فتح فتوح وما راح تكون غير هيك
حماس: في طريقها لتكون فتح فتوح، مش مطولة على فكرة.
الجبهة الشعبية: الله يرحم المؤسس جورج حبش والمناضل وديع حداد ... وحسرتي على تاريخ الجبهة اللي صار ملوح وخالدة جرار ممثلين إلها !!!!

أما أنه مين بمثل غالبية الشعب الفلسطيني منهم صدق ولا واحد منهم بأي شكل من الأشكال ...

لأنه المصاري ما بتشكل أغلبية
والخطاب الديني السياسي ما بشكل أغلبية
والاحتضار ما بشكل أغلبية.

طبعا لا الكل دخل السجال وأي من الموجود لا يمثل جوهر القضية الفلسطينية وبنزكر هون مقولة الشهيد غسان كنفاني " إذا كنا مدافعين فاشلين عن القضية ، فالأجدر بنا أن نغير المدافعين ، لا أن نغير القضية " وبالتالي لا مش مع الحراك الشبابي المدفوع والمأجور والصامت حسب مصالح الأحزاب الضيقة.

شوف الحزبية ظاهرة صحية بحد زاتها ... لكن؛ تتعافى من اللي هي فيه في فلسطين بصير كل خير وبترجع كحالة صحية غير مضرة على صحة القضية الفلسطينية .

[ضيف]

بداية اشكر المشرف الفاضل على هذه الاستضافة الطيبة للمبدعة مي
كما ارحب بك اجمل ترحيب يليق بك مي

لدي الآن سؤال واحد : هل تسكنين الادب ام هو يسكنك ؟
ولي عودة

إن سكنت الأدب فيوم من الأيام راح أرحل عنه

وإن سكنني الأدب فيوم من الأيام راح يرحل عني

فالأدب لا يسكنني ولا أسكنه الأدب الهواء اللي بتنفسه والحالة الوحيدة اللي ممكن تنتهي علاقتي فيه هي الموت الفعلي فقط لا غير.

وآسفة إني تجاوزتك كان تجاوز غير مقصود بكل أمانة

[لحن الجراح]

لا بأس صديقتي

هل انت على اطلاع بالنقد الأدبي ؟

ما رأيك بالمدارس الادبية ؟ واين تجد مي نفسها ؟

هل ترين ان المدرسة الرمزية نجحت في ازاحة الرومنسية ؟ ام ان الرومنطقية تغلب على الانتاج الادبي العالمي الآن ؟

[رمزي الياموني]

من جديد اختي مي
*اصبح الجيل الحالي وانا بالطبع احدهم بعيد كل البعد عن التاريخ العربي بل وعن تاريخ القضية الفلسطينية ومن الممكن لو تم توجيه اسئلة للبعض وانا احدهم عن تاريخ القضية الفلسطينية والاحتلال الاسرائيلي لوجدتي الغالبية يجهلون الكثير عن هذا التاريخ واصبح الشغل الشاغل بالهجرة والتفكير في لهو الحياة ولو تم عمل ندوة علمية بالتاريخ العربي فكم سيكون اهتمام الشباب بهذا الشئ في المقابل لو كان هناك لقاء بين ريال مدريد وبرشلونة سيكون الشباب متحمس وتفتح لهم مواضيع بل ولو تطرق احد للسؤال عن المعرفة بهؤلاء الشباب لوجد ان الاهتمام بهكذا امور اصبح الشغل الشاغل لهم !!!!! هل تتوقعين ان يكون هناك عودة للاقصى الاسير في هذا الجيل ؟؟؟