:::: هستيريااااا :::::

[سائد]

بصراحة ظليت ساكت لاني كنت فاقد الامل وحسيت انه سكرت ومش رح تزبط كانه في رصد على المرمى ... ردة فعلي كانت زي اللي انصدم فسكت وما قدر يبدي اي ردة فعل .... بس خلال المباراة ضغطي وصل مليون وحسيت اني رح افقع

[سائد]

خلال المباراة ما حد بحكي معي في البيت لانهم عارفين كيف بكون معصب وما بجاوب على اي سؤال من اي حد

[مواطن عربي]

يا محلى الفوز لما يخرج من رحم المعاناة
بصراحة قمت انطنط مثل المجنون بالمنصة قدام تبعون العربي لان قبل الجول واحد حكى كلمة مستفزة
بعدين نط عليه ذياب "صمت البشر" وقعت وحسيت حالي شويه دايخ صحصحت بعد ما ذياب رش زجاجه مية صحه
عليه والحمدلله على الفوز والاهم الفرحة الجماهيريه العفويه

وشو بتعمل عند المنصه يا حسون .... يعني حدا بترك متعه الكعده عند جمهورنا وبكعد عالمنصه ... ومع مين

مع اشكال زي هيك ... والحمد لله على نعمه الفوز ... ومبروك اللك ولكل وحداتي

همسه : بدنا نعرف ليش دياب نط عليك ... احكيلنا شو عمل

[مواطن عربي]

بصراحة يا مواطن عند الدقيقة 85 فقدت الامل واخذت اعطي نفسي ابر بنج وانظر للمباريات المتبقية لنا مع باقي الفرق
وانظر الى مباريات الغريم المتبقية . يعني محسوبك كان مخدر وعامل حساب انو نتعادل . والحمد الله جاء الهدف في اخر فرصة
فتذكرت هدف شباب الاردن في مرمى اليرموك الموسم الماضي والذي غير مجريات الدوري لصالح شباب الاردن . يا هل ترى هل هذا الهدف هو الاغلى للوحدات هذا الموسم ؟؟؟؟؟؟

من وجهه نظري هدف غالي جدا ... واذا ما قدر الله لنا الفوز في الدوري فالفضل يعود للهدف الوحداتي القاتل

ان شاء الله قريبا سيكون الوحدات صاحب اللقب ... اعتقد بالكثير الاسبوع القادم في حال الفوز على شباب الارن

همسه : نورت عبد الفتاح نورت

[مواطن عربي]

العشق يا خوي العشق يا خيا

وللك احسنت يا نشأت ... يا وحداتي

[مواطن عربي]

حتي الدقيقة الاخيرة وانا ادعو الله بهدف حتي جاء الفرج وتنفسة الصعداء ونحبست الدموع بعيني
وبقيت احمد الله علي الفوز الغالي الحمدلله

الحمد لله ... بالفعل كانت اول كلمه خرجت مني بعد الهدف ... يا سلامم عليك ابو بهاء ... مبروووووووووووك

[ماجد جامع]

كنت قاعد وبتفرج على اعصابي ومعاي علبه بيبسي ومن كثر حرقت راسي والاحداث والوقت بمشي وضياع فرص بهبل شديت على العلبه وطعجتها وشمطها بلارض وبعديها قمت مره تانيه وشطها برجلي وطلعت من الغرفه الا واسمع كلمة جوووووووول شوي كان اغما عليه لاني حسبتو للعربي وارجع على الغرفه شوي شوي وانا خايف ومغمض عني والا بشوفلك لاعبتنا فرحنين والنتيجه 2- 1 للوحدات واصير ارقص ههههههههههههه ياااااااااااه بس احلى فوز بنسبه الي

[مواطن عربي]

بالنسبة الي
صرخة عبت العمارة و الشارع
و بعدين اتمسمرت قدام التلفزيون أتابع الاكشن،
و بما اني مسجل المباراة، فضليتني أعيد و أزيد و عالبطيء حتى افهم سبب الاعتراض ولا طلع معي أشي
هدف نضيف

و مسكت هالواتساب و هات يا مسجات...

قبل شوي قرأت بموضوع الصحافة اليوم، انه الاعتراض ع ضربة الكورنر مش الهدف!!!
يا سلاااام عالبياخة و السماجة


سبحان الله، الجول بده ييجي ....
الهجمة من أولها كرات مقطوعة ، ولا كرة الا و لعيبة العربي قطعوها و بتوترهم ترجع للوحدات ... و بهاء سددها بانانية، لو مررها يمين او شمال كان انفراد و فرصة جوول رائع. و تبهدل بهاء من اللاعبين الاتنين

بس طلعت ركنية .... والباقي عندكم

صرخ يا عمي ... وخلي كل العالم تسمع ... واحرق روس للصبح ... بالنسبه للاعتراض خليهم يقدموه لمجلس الامم

[مواطن عربي]

مباراه رقعت ضغطنا

اكيد ... رفعته للسما ... بس كيف كان شعورك بعد الهدف

[مواطن عربي]

كسرت 5 الصحون و 3 كاسات الشاي من الفرحة

ههههههه ... طول باللك يا زلمه ... هاظ اذا بنخسر شو بتعمل ...

[مواطن عربي]

الله يسعد قلبك و يسعدك على هيك موضوع خليتنا نعبر علي جواتنا
انت مبدع ورائع

اجمل اشي انه تشارك الاخرين فرحتك ... انا بستمتع وانا بقرأ مشاركه كل شخص ... قمه سعادتي لما جمهور الاخضر

يفرح وينبسط

[مواطن عربي]

انا من المغتربين بالسعودية نطيت بالهواء وقلت هيه هيه

يا هلا بالمغتربين كلهم .... وما بنط الا الوحداتي

[مواطن عربي]

انا بالعمل كنت وكلو الاعضاء عندي فيصلي المهم يا مواطن لم دخل الجول كانو عندي بيجاكرو فيني لم دخل الجول ما شوفت حد ههههههههههههههههههههههههههههههههههههه انحرق راسهم

الله يعطيك العافيه يا حسوون ... هظول عادتهم ولا بغيروها اصلا ... الله يكون بعونك كيف متحملهم بالشغل

لسا حرقه الراس الصح ما اجت ... اصبر انت بس

[مواطن عربي]

شخصياً لم أنفعل كثيراً.. كنت متضايقاً أن العربي كان أخطر في الدقائق الأخيرة.. ولكن انتابني شعور قوي بأننا استعدنا "روح البطل" و"أن تفوز وأنت سيء".. وهي روح الفرق الكبيرة التي تفوز بروح الكلر والجمهور العظيم.. حين رأيت فرحة مراد اسماعيل رغم أنه مستبعد تماماً وهو الأحق باللعب (برأيي).. استعدت حقيقة الوحدات.. ورغم أنني لا أرى في أبو زمع مديرا فنيا بحجم الوحدات.. إلا أنني أحبه كشخص وتعاطفت معه كثيراً مع فرحة الهدف هو وبرهومة مع الضغط الكبير عليهما (على فكرة برهومة مدرب حراس كبير وقدير).. كانت لحظة تصوير الكاميرا لرأفت والمحارمة ومراد وبرهومة وفراس شلباية وأبو زمع لحظة مؤثرة.. وكنت أتمنى لو استطعنا رؤية لقطات فرحة اللاعبين داخل الملعب..

في كل الأحوال.. كل من يحب الوحدات.. كانت تلك لحظة فرح كبيرة بالنسبة له.. وربما.. أتمنى.. أنها كانت لحظة لقب..

يا اهلا بالسينمائي .... نورت .... وان شاء الله بنحقق المطلوب وبنوخذ الدوري والكاس ... وبنشوف الوحدات بمتع وببدع

الفرحه كانت رائعه نعم ... والكل تاثر بما فعله ابو زمع وبرهومه واللاعبين ... ان شاء الله الاخوان بزودونا بالفيدوهات

وبنشوف الفرحه من قلب الحدث ....

[مواطن عربي]

ابو عمار يا صديقي الوحدات مصدر فرحي وقد يكون الوحيد هذه الايام ..... ذكرتني بالضغط ... بدك الصحيح قلبي اوجعني عن جد بس الحمد لله الف حمد وشكر لله.



تسلم يا مواطن على على عواطفك .... بصراحة انصدمت ... بصراحة انذهلت ... بصراحة أكثر احتفلت (Mute) ... طبعا كنت ضيف كبير البيت ابو عمار الجنيدي ولأول مرة بزوره ببيته وحضرناها ومعنا ابن ابو عمار الشاب الصغير عبد الرحمن الي (نق) شوي قبل نهاية المبارة خخخخخخ ... هيك وصفتلك الاجواء وأكيد بتعرف ليش احتفلت (بصمت).

لمى اجا الجول وقفت وحطيت ايدي الثنتين على ثمي وتسمرت قدام الشاشة ... ابو عمار مسك الاي باد علشان يكتب جووووووووووووووووووووووووووووووووووووول ... ظليت متسمر وواقف حتى صفر الحكم ... حاولت أعرف مين جاب الجول وادعي يا رب يكون بهاء فيصل علشان يفك النحس ... بعرفش بحبو لبهاء من الله هيك ... بس نزل الجمهور على الملعب وتأكدت من النتيجة ... بعرفش كيف وليش نشف كل العرق البارد وراح الصداع والضغط وراحت زغللة العيون حتى شلحت النظارة يا زلمة وشفت الشاشة كويس ... بس كيف بث المباراة والالوان واختيار لون الكرة وتأخير البث علشان نشوف السيارات تاعون السباق؟ طكع صح؟

الله ريته الف سلامه ... هاظ انت ابو عدي كاين مضغوط اكثر مني قبل الفوز ... اقسم بالله انا من تحت راس التلفزيون

ما كنت اعرف الطابه مع مين ... ولا وين الطابه ... بس اخر 10 دقايق الصوره صارت اوضح ... انتا بتفكر لحاللك

يا زلمه اذا الي في الملعب معروفوش مين الي حط الجول ... كيف الي عالتلفزيون ... الله وكيللك في النقل المباشر

بعد ما خلصت المباراه ... كل واحد بسئل الثاني مين الي حط الجول ... الحمد لله فزنا ومش مهم مين سجل

وان شاء الله بنفرح دايما