اعتقد ان سبب الخسارة كان الهدف الثاني جائهم هدية على طبق من ذهب يعني مش شطارتهم ولدنة لاعبينا ولكن قدر الله وما شاء فعل ولكن هل جماهيرهم كانت حسب النسبة ام ان كل جماهيرهم كانت موجودة بالملعب.
بعض الأسماء يجب أن تخرج من النادي ولكن انداي لماذا لم يلعب كان دفاعهم ما طلع من منطقته
منذ بداية المباراة حين كان زريق وسوني أساسيين خفق قلبي وهذا ما حصل؛ الذي يتحمل الخسارة ابو زمع باختياراته وهدف الخسارة يتحمله الفاخوري بولدنته واستهتاره
أجمل مباراة وأحلى أداء من الوحدات وأعلى روح من اللاعبين، لولا أخطاء بعضهم، والتي جيّرت المباراة بنتيجتها لصالح الرمثا.
وهاي أبو زمع حقق الأمنيات للكثيرين من اللي بدهم أداء حتى لو خسر الوحدات..!.
اللي بيفهموا في الفطبول كثيــــــــــر ومعترضين على التشكيلة وعلى وجود هذا اللاعب فيها واستبعاد الآخر، فقط بحب أذكِّرهم أنه خلال سبعة أيام في مباراتين ثقــــــــــال للوحدات، الأولى مع الرمثا اللي حقق لكم فيها (أبوزمع) أمنياتكم بالأداء الجميل وخسرها لعدة عوامل ولأسباب هو ما إلوش دَخَل فيها، والثانية مع الفيصلي بعد أسبوع، ويتوسط هاتين المبارتين مباراة في بطولة كأس الأردن.. أبو زمع في هذه التشكيلة لعب بالأجهز والأنسب خلال الشوط الأول يا مَن تفهمون كثيرا في الفطبول، وطبعا آخذا في الحسبان المباريات القادمة، سواء اللي في الكأس أو اللي مع الفيصلي، أو اللي بعد الفيصلي.. لأن هذا دوري،، والأنسب والأجهز اللي لعب فيهم في الشوط الأول واللي قِمْتوا قيامتهم ياما كنتم تطالبون بهم أساسيين، وحتى لو ما كنتوش تطالبون بهم، فالظروف من إصابات وتراكم إنذارات وعدم جاهزية والتحضير والترييح للمباريات القادمة كلها عوامل فرضت على (أبو زمع) اللعب بهم... في ظروف ومتغيرات وأحوال -عدم المؤاخذة- أنتم ما بتعرفوها لأنكم مِش عايشينها، وتفرض على الجهاز الفني اللجوء إلى استخدام أوراق بعض اللاعبين اللي مِش جايّين على هواكم تحسبا لمضاعفات إصابة أو تراكم إنذارات أو عدم جاهزية كاملة، وربنا يستر اللاعبين البدلاء اللي نزلوا في الشوط الثاني.... وأولا وأخيرا الشغلِه كلها توفيق من رب العالمين، يعني سوني سعد لو لبست برجله الكرة اللي مررها له زعترة في الشوط الأول قبل أهداف الرمثا كان صار النجم السوبر..!.
عبد الله نصيب (ديارا) أعطوني واحد من جماهير الوحدات قبل مباراتنا مع الفيصلي أعطاه ولو نسبة 0.001% أن يكون أساسيا في تلك المباراة..؟.
ديارا صار تْرِنْـد الموسم
أخيرا، وبرضُه للي بيفهموا كثيـــــــــر في الفطبول:
عيب وحرام فضح أعراض لاعبينا، وللأسف هون وفي منتدانا النظيف هذا..!.
وحرام التْحِسْبِن عليهم والدعاء عليهم بعدم التوفيق.
وشيء مقرف ومؤذي للأذن وللعين ترديد الأسطوانة الدائمة والمستمرة بالاستهزاء والحط من قيمة المدير الفني بعد كل تعثر للوحدات سواء بالخسارة أو التعادل على قلة هذه الحالات، والحمد لله ما زلنا متصدرين، وحتى بالفوز... أبو زمع مِش هُو لوحده الوحدات..!.
يعني انت اخي الكريم بتحكي عن حالك بتفهم في الفطبول وبتيجي تحكي لو رجل سوني لبست على الكره ولو كره الرمثا اللي بالعارضة اجت حول ، ابو زمع بنزل بتشكيله ما فيها أي تجانس على سبيل المثال زعتره موجود وما تفعيل للأطراف يعني هو وقلته واحد والشروط الثاني بيصير يعدل هذا هو اللي معترضين عليه مش على ابو زمع شخصيا
يعني انت اخي الكريم بتحكي عن حالك بتفهم في الفطبول وبتيجي تحكي لو رجل سوني لبست على الكره ولو كره الرمثا اللي بالعارضة اجت حول ، ابو زمع بنزل بتشكيله ما فيها أي تجانس على سبيل المثال زعتره موجود وما تفعيل للأطراف يعني هو وقلته واحد والشوط الثاني بيصير يعدل هذا هو اللي معترضين عليه مش على ابو زمع شخصيا
أنا يا عزيزي ما حكيت عن حالي بفهم في الفطبول
أنا بتابع تعليقات الكثيرين هنا ممّن أراهم يفهمون في الفطبول، وبحاول قدر الأمكان أوضِّح لهم بعض الأمور اللي غايبِه عنهم، عشان يدعّموا فيها آراءهم النيِّرة، أو يرجعوا عن آرائهم التي تحتمل الخطأ في الحكم والتجنّي على الآخرين، وبحاول قدر الإمكان كمان أن أنصحهم لوجه الله تعالى أن يكونوا حريصين في اللي بيكتبوه في أعراض الناس والاستهزاء بهم.
بعدين أنا ما حسبتهاش زيّك حالة لبس الكرة برجل سوني سعد، وقياسها على حالة ارتطام كرة الرمثا بعارضة الوحدات، لا يا عزيزي.. أنا بس ذكرت هذه الحالة لقياسها على حالة التوفيق من رب العالمين لديارا في مباراة الفيصلي، وإلا كان ذكرتُ حالة الهدف الصحيح لمحمود زعترة اللي انحسبت فاول على ديارا نفسه.
ثم يا أخي الكريم، أنا كتبت كثير أسباب وعوامل فرضت على (أبو زمع) اختياراته في الشوط الأول، والتعديلات اللي أنت بتحكي عنها في الشوط الثاني، بمعنى أنت.. سواء بتفهم في الفطبول أو ما بتفهم فيه، أو أنا اللي بفهَمِش في الفطبول، أو غيرنا من اللي بيفهموا كثيـــــــــــر أو شويِّه في الفطبول، لازم اللي بيعرفِش أن هناك أسبابا وعوامل تفرض على المدير الفني بعض الاختيارات أحيانا، فلازم يعرفوها، عشان نكون منطقيين شويِّه في طروحاتنا.