اول اشي شكرا لطارق خوري وبشار حوامدة على المكافئات
ثاني اشي انا ليل نهار بتابع المواقع وما شفت اي تصريح لعضو ادارة بحكي انه المكافئات سلبية والعكس شفت انه الكل بحكي عن ضرورة المكافئات وعشان هيك فش داعي ندور على حجج على موضوع مش مستاهل وانا بطلب الخوان هون يثبتو انه في اداري صرح انه المكافئات سلبية وبتحداهم يطلعو اي تصريح فيه هذا الحكي بعد الاعلان عن المكافئات من الرئيس ونائبه
زي ما حكيت للأخ الكريم ( وحداتي للسما ) يا ابو الوليد ، المشكلة مش بـ 25 أو 26 أو حتى 28 لاعبا في الفريق ..
المشكلة إذا إجينا نحللها سنجد لها أبعادا كبيرة كما ذكرتُ في موضوع الإعلامية السابق بهذا الشأن الذي أُغلِق ، وتتلخّص على النحو التالي :
عدم الوضوح في مبلغ المكافأة الإجمالي من أصله عندما تم الإعلان عن منحها ، ولا في شروطها ، فلقد كان المبلغ الإجمالي حسب ما نُشِر وقرأناه وقرأنا معه الشروط هو 800 دينار لكل لاعب ، 100 الأهلي دوري + 200 شباب الأردن كأس + 200 الفيصلي دوري + 300 شباب الأردن دوري ، ليأتي السيد رئيس النادي ويوضّح أن المبلغ كان إجماليا 2000 + 3000 + 2000 + 3000 دينار على التوالي لكل مباراة وبشكل إجمالي لكل اللاعبين !!.
ومن هنا ،
وعلى الرغم من أنه ( كثّر الله خيرهم الرئيس ونائبه والله يعطيهم بزيادِه على ما قدّموا ) إلا أنني أحمّل مسؤولية هذا اللغط وهذه الشوشرة وعدم الوضوح وعدم الشفافية لمن قدّم قبل أن أحمّلها لمن قام بعمل ( البلبلِه ) والشوشرة وأخذ يُصرّح هنا وهناك ، ويُطالب بدفع مبلغ المكافأة على حد تصريح السيد ريس النادي هنا .. وأظن أن المقصود بمن صرّح وعمل هذه ( البلبلِه ) هو مدير النشاط ..
فيا إخوان ، يا كبار ، يا أعمدة ، ويا أغلبية ويا أصحاب القرار في مجلس إدارتنا فكّـونا من لِعِب الاولاد الصغار هذا ، واطلعوا وضّحوا من الأول بشفافية وبمصداقية قدّيش هي المكافأة ، وشو شروطها .. أما مِش تلاحقوا بعض على النقرة زي الاولاد الصغار هذا حكى هيك ، وعشان حكى هيك وصرّح بطّلِت أدفع أو خفَّضِت .. مع أن اللي بيحسبها صح بيكتشف إنّو ما فيش تخفيض ولا ما يحزنون ، لو أنكم من الأول كنتم واضحين ،
وطبعا مش في هاي لحالها .. لأ ، في كل إشي .
والله عيـــــــــــــــب !.
ومعلش ، أرجو التكرم بتقبّل هذه الجزئية في حديثي وعذري لطرحها بشفافية ووضوح :
حيث أن الإعلام الوحداتي ، ومنه نحن هنا في هذا الموقع علينا التأكّد والتأكّد والتأكّد ثم التدقيق والمتابعة ثم التأكّد النهائي من كل معلومة تصدر عن هيك أمِّه قبل نشرها ، وبعدين ننشرها ..
وعذرًا ، فأنا أعتبر أنفسنا مسؤولين كذلك عن هذه الشوشرة اللي حصلت .
وأنتم يا لاعبينا ، إذا بدكم تظلّوا تدوّروا على هيك قصص وِتْدُوروا ورا هذا وذاك ، وتستنّوا في المكافآت عشان تلعبوا وتفوزوا ، فالله الغني عنكم وعن كل بطولاتكم .. إحنا حبّيناكم لأننا نشعر بأنكم تعطوا من أجل الوحدات ، وقاعدين بنطارد وراكم في المنيحة والعاطلِه ، في عزّ الشتا وفي عزّ الحرّ ، في البلاد هون وفي آخر ما عمّر الله .. ففكّوكم من كل هالقصص الطرمة !.
حقيقة نشكر الرئيس ونائب الرئيس على هذه المبادرة ،،،
والتحفيز امر موجود في كل المؤسسات وحتى داخل الاسرة عندما يتفوق الابن في تحصيله الدراسي مثلاً،،،
لكن لا ادري لماذا تخيلت ان الموضوع فيه شيء من تحميل المسؤولية لعضو مجلس الإدارة الذي انتقد هذا الامر،، وللامانة لست ادري من هو هذا العضو،،، لكن بدا الامر وكأنه تحويل النقد لم انتقد،،،
اللاعب الوحداتي اصيل ولا ينظر للمادة
بعكس لاعبي الفرق الأخرى وحدثت مع الغريم والجزيرة وشباب الأردن سابقا ورفضوا اللعب الا اذا حصلوا على رواتبهم وليس المكافأة
احسن مكافأه هي الفوز واعادة الروح للفريق في هذه الفترة الصعبه واستمرارية المكافأه لنا كجماهير ان يواصل لاعبو الاخضر الفوز بغض النظر ان كنا عناك حوافز مالية ام لا
كنت منزّل مداخلة نفس مداخلتك هاي ، وقبل أن أعتمدها شاهدتُ مداخلتك في صندوق المشاركات المطروحة :
المهم انا كنت مقسِّم على 25 لاعبا وبيطلع نصيب اللاعب الواحد من هذه المكافأة الإجمالية هو 400 دينار ، مع العلم أن عدد لاعبي الفريق الأول هو 28 لاعبا وإذا تقسّم المبلغ عليهم بيطلع الفرق 7 دنانير بسّ لكل لاعب ، سبقتني . وإن شاء الله بتسبقني على الجنة .. مش مهم ، المهم الفكرة .. وهو أنه مش هذيك المشكلة زي ما تفضلتَ أخي الكريم ، لكن أرجو أن تلاحظ أن مَنْ رصد هذه المكافآت وقدمها ، قد أعلن عن عدم رصد أية مكافآت مستقبلية ، وهون المشكلة !.
وعموما الله لا يجيب مشاكل ، فكلنا ثقة بلاعبينا وبحسِّهم العالي بالمسؤولية ، وبغيرتهم وبحرقتهم على اسم الوحدات ، وعلى أسمائهم وعلى سمعتهم في تقديم كل جهد ممكن كي يبقى الوحدات في الطليعة على الدوام بمكافآت وبغيرها ...