الأشياء اللي بتعجبني في الشعب الأردني برضه مفهومنا الغريب للكرم اللي ببحوله لقزز... يعني مثلًا:
1: تفضل معنا
2: شكراً، شبعان
1: يا زلمة جاملنا
2: تسلم يا سيدي بس متغدي ومش قادر آكل
1: يا زلمة لقمتين شو بدهم يساووا
2: يا حبيبي ما بحبه
1: طيب جرب بس ما رح تندم
2: بقولك مش قادر
1: علي الطلاق إلا إنت ماكل!
ما علينا...
من الأشياء الجميلة كمان فينا القدرات التمثيلية الباهرة، خصوصاً لما تشوف واحد بتعرفه في الشارع وبدك تعمل حالك مش شايفه. واللي ببهرك في الموضوع ثقتنا العالية في قدراتنا لدرجة إنه بتكون مارق في شارع فاضي فش في غير إنت والشخص اللي بدك تعمل حالك مش شايفه، وبرضه بتعمل حالك مش منتبه! فنان...
من الأشياء اللي بتعجبني جداً في الشعب الأردني كيف كلنا بنكون بنبحلق في بعض. في الشارع، في المطاعم في القهاوي وين ما بدك... السبب غامض، بس الظاهرة أشهر من أن تعرف ومعترف فيها... أنا شخصياً كتير مرات بلاقي حالي بطلع في الناس وأنا ماشي، ليس ما بعرف... طبعاً الموضوع بصير محرج مرات، خاصة إنه في ناس عندهم جنون شك ممكن يخافوا، واللي عندهم جنون عظمة ممكن يفكروك معجب، واللي عندهم عقدة نقص ممكن يفكر إنه فيه إشي غلط. وبما أنه شعبنا يزخر بهذه الحالات، فالأحسن الواحد يدير باله