أكيد كلنا زعلنا و انقهرنا .. خسارة فاسية ما حدا كان متوقعها .. وا حتى أشد المتشائمين ....
أنا صراحة بفضل أحكي عن موضوع الخسارة " المؤلمة " بطريقة مختلفة ..
انا وكل عشاق الأخضر , كنا على الموعد .. و رحنا على الستاد .. و بالصدفة شفت صديقي " فيصلاوي " حضرنا المباراة مع بعض ... و كان جنبي ... وكانت هاي أول مرة بحضر معي أي مباراة ...ومن أول ما وصلنا و انا " أكلت راسه" بجمهورنا و انتمائه للأخضر و أخلاق جمهورنا ...الخ
وفجأة .... لما صار الجمهور يسب على الحكم ... و على رئيس النادي .... " بأقبح و أدنى المسبات " طبعاً بدأت اسئلة "الفيصلاوي " صديقي المحرجة " وين الإنتماء اللي بتحكيلي عنه ... ووين الأخلاق اللي أكلت راسي فيها ... ولا انتو بس شاطرين بالتنظير !!!! "
ما كان عندي اي اجابة !!
الجمهور اللي كان يسب فئة مندسة .. بس كان " مع الأسف " فئة كبيرة جداً من جمهورنا ....
فعشان هيك بحب احكي : " كَـمَـا تَـكُـونُـوا يُـولَّـى عَـلَـيْـكُـم " ....
لازم ما نستغرب اذا كانت ادارتنا فاشلة . أو جهازنا التدريبي أفشل ...
واذا بدنا الوحدات يصير نادي محترف .. لازم الإحتراف يبدأ من عنا .. احنا الجمهوور ...
لما نصير احنا جمهور محترف .. مباشرة رح تكتمل المنظومة بالتدرج ... رح يصير عنا لاعبين محترفين .. و جهاز تدريبي محترف ... و إدارة واعية و " محترمة " و محترفة ..
وبرجع و بكرر
كَـمَـا تَـكُـونُـوا يُـولَّـى عَـلَـيْـكُـم
إذا بدنا نخلي الجمهور بحالهم .. معناته خلي اللاعبين بحالهم .. و كمان خلي الادارة بحالها .... !
قاعدين منلوم اللاعبين ليش عصبيين ومتوترين دائماً !!! طبيعي يكون هيك .. لأنه اذا خسر .. مبااااشرة رح يسمع مسبته بامه و باخته!!
انه الجمهور يصير يسب على اللاعبين " اللي طول عمرنا كنا نتغنى فيهم " وعلى الإدارة مجرد ما نخسر .. هاد أكيد ما بحل المشكلة ..بالعكس .. بزيد المشكلة تعقيد ...
" لا تنه عن خلق وتأتى مثله, عار عليك إذا فعلت عظيم "
أحنا بس شاطرين بالفلسفة .. ونلوم اللاعبين و الادارة .... لازم أول اشي نلوم حالنا .. بعدين نلوم غيرنا !!!
الجمهور الوحداتي ما عمل هيك الا من قهره والله العظيم يا اخ جهاد تعبنا والالم من الخسائر مزع قلوبنا ...
صحيح انو ما بصير نشتم الناس باعراضهم وجمهور الوحدات راقي وولاد عالم وناس وبعرفو العيب والصح بس اعذرهم هاد كلو من المراره والويل الي شفنا مبارح بالملعب ....
أخي بالرغم من ان الشتم غير مقبول و خصوصا على الاعبين,إلا انه كان عليك الرد على صديقك الفيصلاوي بأن الشتم ليس من عادة جماهير الوحدات و ان ما صدر منها ما هو الا ردة فعل لضياع الحلم الذي اقترب لمدة موسمين على التوالي و أضاعه الاعبون و الادارة و بالرغم من ذلك فإن تصرفهم مرفوض. و كان عليك ان تذكره بجمهور فريقه الذي يشتم على الطالعة و النازلة,بل أن شتائمه القذرة تعدت نادي الوحدات لتصل الى الشهداء و المقدسات.